ខេត្តស្វាយរៀង: រថយន្ដកាមរីឆ្លាមមួយគ្រឿង ទំនងជាឆ្លងចរន្ដអគ្គិសនី បណ្ដាលឲ្យឆាបឆេះយ៉ាងសន្ធោសន្ធៅ បង្កឲ្យភ្ញាក់ផ្អើលឡើង កាលពីវេលាម៉ោង១រំលងអធ្រាត្រ ឈានចូល ថ្ងៃទី៨ ខែសីហា ឆ្នាំ២០២០ នៅក្នុងភូមិជ្រៃធំ សង្កាត់ព្រៃអង្គុញក្រុងបាវិត ខេត្តស្វាយរៀង។
មន្រ្ដីនគរបាលក្រុងបាវិត បានឲ្យដឹងថា ម្ចាស់រថយន្ត ឈ្មោះ សេក សុខុន អាយុ៥២ឆ្នាំ មុខរបរជាបុគ្គលិកផែតេងឡាយ ស្នាក់នៅបណ្ដោះអាសន្ន នៅក្រុងបាវិត។ រីឯរថយន្ដដែលរងនូវការឆាបឆេះនោះ ម៉ាក កាមរីឆ្លាម ពណ៌ស្ក ពាក់ស្លាកលេខ ភ្នំពេញ 2X-2578 ។
ប្រភពព័ត៌មាន បានឲ្យដឹងថា កាលពីវេលាខាងលើនេះ គេឃើរថយន្ដខាងលើបើកបរមកដល់ចំណុចកើតហេតុ ស្រាប់តែមានភ្លើងឆាបឆេះយ៉ាងសន្ធោសន្ធៅ បង្កឲ្យភ្ញាក់ផ្អើលដល់អ្នកភូមិ រាយការណ៍ទៅសមត្ថកិច្ច។ លុះបន្ដិចក្រោយមក ទើបកម្លាំងមូលដ្ឋានកងរាជអាវុធហត្ថក្រុងបាវិត និងកម្លាំងមូលដ្ឋានកងរាជអាវុធហត្ថស្រុកស្វាយទាប សហការជាមួយកម្លាំង នគរបាលក្រុងបាវិត និងកម្លាំងស្រុកស្វាយទាប បើករថយន្តពន្លត់អគ្គិភ័យ ចំនួន២គ្រឿង ចេញមកធ្វើអន្តរាគមន៍ពន្លត់ភ្លើង។
ទោះជាយ៉ាងណាក៏ ដោយសារភ្លើងឆាបឆេះមានល្បឿនលឿនពេក ទើបមិនអាចជួយសង្រ្គោះរថយន្ដនោះបាន។ ប៉ុន្ដែករណីនេះ មិនបានបង្កឲ្យមានគ្រោះថ្នាក់ដល់មនុស្សណាម្នាក់នោះឡើយ៕
