បើតាមគេហទំព័រ Worldometer បានចេញផ្សាយ កាលពីវេលាម៉ោង៨ព្រឹក ថ្ងៃទី១២ ខែវិច្ឆិកា ឆ្នាំ២០២០ បានឲ្យដឹងថា ចំនួនអ្នកឆ្លងថ្មី នៃកូវីដ-១៩ សរុបជាង៦១ម៉ឺននាក់ និងស្លាប់ថ្មីជាង១ម៉ឺននាក់ ធ្វើឲ្យចំនួនអ្នកឆ្លងសរុប នៅទូទាំងពិភពលោក កើនដល់ជាង៥២លាននាក់ ស្លាប់ ជាង១,២៩លាននាក់ និងជាសះស្បើយ ជិត៣៧លាននាក់។
អាស៊ី ជាតំបន់មានអ្នកឆ្លងច្រើនជាងគេបំផុត នៅលើពិភពលោក ហើយតំបន់នេះមានអ្នកឆ្លងថ្មីសរុប ជាង១០ម៉ឹននាក់ និងស្លាប់ថ្មីសរុប ជាង១៦០០នាក់ ធ្វើឲ្យចំនួនអ្នកឆ្លងសរុប នៅក្នុងតំបន់នេះ កើនដល់ ១៤,៧លាននាក់ ស្លាប់ជាង២៦ម៉ឺននាក់ និងជាសះស្បើយជាង១៣លាននាក់។ រីឯប្រទេសដែលមានអ្នកឆ្លងច្រើនជាងគេ នៅតំបន់អាស៊ី រួមមាន ឥណ្ឌា (ឆ្លងច្រើនលំដាប់លេខ២នៅលើពិភពលោក បន្ទាប់ពីអាមេរិក) អ៊ីរ៉ង់ អ៊ីរ៉ាក់ ឥណ្ឌូនេស៊ី បង់ក្លាដែស តួកគី និងហ្វីលីពីន …ជាដើម។
អឺរ៉ុប ជាតំបន់មានអ្នកឆ្លងជំងឺកូវីដ-១៩លំដាប់លេខ២ ដោយមានអ្នកឆ្លងថ្មីសរុប ជិត២៧ម៉ឺននាក់ និងស្លាប់ថ្មី ជាង៤៧០០នាក់ ធ្វើឲ្យចំនួនអ្នកឆ្លងសរុប កើនដល់ជាង១២,៩លាននាក់ ស្លាប់ជាង៣០ម៉ឺននាក់ និងជាសះស្បើយ ជាង៤,៧លាននាក់។ ប្រទេសមានអ្នកឆ្លងច្រើន នៅក្នុងតំបន់អឺរ៉ុប រួមមាន បារាំង រុស្ស៊ី អេស្ប៉ាញ អង់គ្លេស អ៊ីតាលី និងអាល្លឺម៉ង់…ជាដើម។
អាមេរិកខាងជើង ជាតំបន់មានអ្នកឆ្លងច្រើនលំដាប់លេខ៣ ដោយមានអ្នកឆ្លងថ្មី សរុប ជាង១៥ម៉ឺននាក់ និងស្លាប់ថ្មី ជាង២ពាន់នាក់ ធ្វើឲ្យចំនួនអ្នកឆ្លងសរុប កើនដល់ជាង១២,៦លាននាក់ ស្លាប់ជាង៣៧ម៉ឺននាក់ និងជាសះស្បើយជាង៨លាននាក់។ ប្រទេសមានអ្នកឆ្លងច្រើន នៅក្នុងតំបន់នេះ រួមមាន សហរដ្ឋអាមេរិក ម៉ិកស៊ីក កាណាដា …ជាដើម។
អាមេរិកខាងត្បូង ជាតំបន់មានអ្នកឆ្លងច្រើនលំដាប់លេខ៤ ហើយតំបន់នេះ មានអ្នកឆ្លងថ្មីសរុប ជាង៧ម៉ឺននាក់ និងស្លាប់ថ្មីសរុប ជាង ១២០០នាក់ ធ្វើឲ្យចំនួនអ្នកឆ្លងសរុប កើនដល់ ជាង១០លាននាក់ ស្លាប់ជាង៣០៥ ០០០នាក់ និងជាសះស្បើយ ជាង៩លាននាក់។ ប្រទេស មានអ្នកឆ្លងច្រើន នៅក្នុងតំបន់នេះ រួមមាន ប្រេស៊ីល អាហ្សង់ទីន កូឡុំប៊ី ប៉េរូ និងឈីលី …ជាដើម។
អាហ្វ្រិក ជាតំបន់មានអ្នកឆ្លងច្រើន លំដាប់លេខ៥ ហើយតំបន់នេះ មានអ្នកឆ្លងថ្មីសរុប ជាង១៤ ០០០នាក់ និងស្លាប់ថ្មី ៣៣២នាក់ ធ្វើឲ្យចំនួនអ្នកឆ្លងសរុប កើនដល់ជាង១,៩លាននាក់ ស្លាប់ជាង៤៦០០០នាក់ និងជាសះស្បើយជាង១,៦លាននាក់។ ប្រទេសមានអ្នកឆ្លងច្រើន នៅក្នុងតំបន់នេះ រួមមាន អាហ្វ្រិកខាងត្បូង ម៉ូរ៉ុកកូ និងអេហ្ស៊ីប…ជាដើម។
អាសេអានី ជាតំបន់មានការឆ្លងតិចជាងគេបំផុត នៅលើពិភពលោក ហើយតំបន់នេះ មានអ្នកឆ្លងសរុប ជាង៤១ ០០០នាក់ ស្លាប់៩៩៣នាក់ និងជាសះស្បើយជាង ៣២ ០០០នាក់។
សូមជម្រាបថា វីរុសកូរ៉ូណា ហៅកាត់ កូវីដ-១៩ (Coronavirus Disease 2019 = Covid-19) នេះ បានផ្ទុះឡើងជាលើកដំបូង នៅក្នុងទីក្រុងវូហាន (ចិនអាន៖ អ៊ូហាន) ខេត្តហ៊ូប៉ី នាភាគកណ្ដាល នៃប្រទេសចិន កាលពីអំឡុងខែធ្នូ ឆ្នាំ២០១៩។ រហូតមកដល់ពេល វីរុសនេះ កំពុងតែរាតត្បាលពាសពេញពិភលោក ដោយមានប្រទេស និងដែនដីចំនួន២១៨ កំពុងចម្លងមេរោគនេះ៕
